News

इंग्लंडचा भारतावर सनसनाटी विजय.

56Views

मुंबई :-

इंग्लंड महिला संघाने गुरुवारी वानखेडे स्टेडियमवर पार पडलेल्या मालिकेतील तिसऱ्या वनडेमध्ये सनसनाटी विजयाची नोंद केली. मालिका याआधीच गमावलेल्या इंग्लंडने तिसऱ्या वनडेत भारतीय महिला संघावर दोन विकेटनी मात केली. भारताच्या २०६ धावांच्या आव्हानाचा पाठलाग करताना इंग्लंडची अवस्था ५ बाद ४९ अशी झाली होती; पण अष्टपैलू दानिली व्याटने (८२ चेंडूत ५६) दोन महत्त्वपूर्ण भागीदारी रचत इंग्लंडचा ‘व्हाइटवॉश’ टाळून त्यांना मालिकेतील किमान एक वनडे जिंकून दिली.

कर्णधार हीथर नाइटसह (६३ चेंडूंत ४७) आणि जॉर्जिया एलविस (५३ चेंडूंत नाबाद ३३) यांच्यासह व्याटने उपयुक्त भागीदारी केली. विजयी लक्ष्य ४८.५ षटकांत पार करत इंग्लंडने आयसीसी महिला चॅम्पियनशिपमधील विजयाच्या दोन महत्वपूर्ण गुणांचीही कमाई केली. जगज्जेता इंग्लंड महिला संघ सध्या गुणवतक्त्यात सातव्या क्रमांकावर असून अव्वल चार संघांना २०२१च्या वर्ल्डकपमध्ये थेट प्रवेश मिळेल.

आव्हानाचा पाठलाग करणाऱ्या इंग्लंडच्या आघाडीच्या फळीला झुलन गोस्वामीने (४१ धावांत ३ विकेट) हादरवले होते. तिने एमी जोन्स (१३), लॉरेन विनफील्ड (२) आणि तमसिन ब्युमॉन्ट (२१) यांच्या विकेट काढल्या. त्यात ऑफ स्पिनर दीप्ती शर्माने फॉर्मात असलेल्या नताली सायव्हरचा (१) अडसर दूर केला. तर मग शिखा पांडेने साराह टेलरला (२) पॅव्हेलियनमध्ये धाडले. अशा परिस्थितीतही व्याट डगमगली नाही. तिने उपयुक्त भागीदारी रचून भारताच्या हातातोंडाशी आलेला विजय खेचून आणला.

स्कोअरबोर्डः भारतीय महिला संघ ८ बाद २०५ (स्मृती मानधना ६६, पूनम राऊत ५६, दीप्ती शर्मा २७, शिखा पांडे २६; कॅथरिन ब्रन्ट १०-२-२८-५) पराभूत वि. इंग्लंड महिला संघ ८ बाद २०८ (एमी जोन्स १३, तमसिन ब्यूमॉन्ट २१, हीथर नाइट ४७, दानिली व्याट ५६, जॉर्जिया एलविस नाबाद ३३, कॅथरिन ब्रन्ट १८; झुलन गोस्वामी ९-०-४१-३, शिखा पांडे १०-१-३४-२, पूनम पांडे ९.५-०-४१-२).

‘विजयाचे दोन गुण मिळवण्याची संधी आम्ही दवडली. पाकिस्तानविरुद्ध आम्ही खेळणार नाही. अन् आता वेस्ट इंडिजविरुद्धचीच मालिका राहिली आहे. या मालिका विजयाने भारतीय संघाला आत्मविश्वास दिला आहे’

Nikita Wagde
the authorNikita Wagde

Leave a Reply