News

औरंगाबाद येथे भाजप-शिवसेना युतीचा मेळावा.

8Views

औरंगाबाद:

भाजप-शिवसेना युतीच्या औरंगाबाद येथील मराठवाडा विभागीय मेळाव्यात इतर घटकपक्षांना डावलण्यात आल्याच्या चर्चेला मुख्यमंत्री देवेंद्र फडणवीस यांनी पूर्णविराम दिला आहे. २४ तारखेला कोल्हापूर येथे महायुतीतील सर्व सहकारी पक्षांचे नेते उपस्थित राहतील, असं त्यांनी स्पष्ट केलं. यावेळी त्यांनी विरोधकांना टोला लगावला. तुम्ही कितीही काडी केली तरी सगळे सोबत राहणार आहेत, असं ते म्हणाले.

युतीच्या मेळाव्याला मुख्यमंत्री फडणवीस यांच्यासह शिवसेना पक्षप्रमुख उद्धव ठाकरे उपस्थित होते. या मेळाव्यात अर्जुन खोतकर यांनी जालन्यातून माघार घेत असल्याचं जाहीर केलं. खोतकर-दानवे हे एकत्र आल्यानं औरंगाबाद आणि जालन्यातील सर्व कार्यकर्त्यांना आनंद झाला. भाजप-शिवसेना युतीप्रमाणे खोतकर आणि दानवे यांच्यात फेविकॉलचा मजबूत जोड झाल्याशिवाय राहणार नाही, असा विश्वासही त्यांनी व्यक्त केला. भाजप आणि शिवसेना एकमेकांना बोलले. पण मनाने कधीच वेगळे झालो नव्हतो. सत्तेसाठी हे दोन्ही पक्ष कधीच एकत्र आले नाहीत. मातृभूमीवर प्रेम करणारे नेहमीच एकमेकांच्या सोबत राहतात, असंही त्यांनी स्पष्ट केलं. मराठवाड्यातील आठही जागा भाजप-शिवसेनेच्या निवडून येतील यात अजिबात शंका नाही, असा विश्वासही त्यांनी व्यक्त केला.

यावेळी फडणवीस यांनी तत्कालीन आघाडी सरकारवर टीका केली. महाराष्ट्राच्या इतिहासात शेतकऱ्यांना मिळाली नाही, इतकी मदत युती सरकारने दिली. ७० हजार कोटींची कर्जमाफी केली असं शरद पवार सांगतात, पण महाराष्ट्रात फक्त चार हजार कोटी रुपये दिले, हे ते सांगत नाहीत. १५ वर्षांत फक्त एकदा दिले तर डांगोरा पिटतात. पण आता तर दरवर्षी ७० हजार कोटी रुपये शेतकऱ्यांना मिळणार आहेत, असं त्यांनी सांगितलं.

यावेळी उद्धव ठाकरे यांनीही युतीच्या कार्यकर्त्यांना मार्गदर्शन केलं. ‘आपली युती फुलांसारखी सदैव टवटवीत ठेवणं आणि जनतेला त्याचा सुगंध देणं ही आपली जबाबदारी आहे, असं आवाहन त्यांनी युतीच्या नेत्यांना आणि कार्यकर्त्यांना केलं. आघाडी करताना हातात हात घालून तंगड्यात तंगडं घातलं आहे, पडणार ते नक्कीच, असा टोलाही त्यांनी आघाडीला लगावला. मी शिवसैनिकांना आणि भाजपच्या कार्यकर्त्यांना सांगतोय की ज्यांच्या आशीर्वादाने हा भगवा फडकतोय त्या मायबाप जनतेची फक्त मते नकोत, त्यांचे आशीर्वाद पाहिजे. शिवसेनाप्रमुखांनी नेहमी मला गोरगरीबांच्या मुलांची काळजी घ्यायला, त्यांचे लाड करायला शिकवले आहे, असं त्यांनी सांगितलं. भगवा उतरवणे तर सोडाच, कोणाचीही त्या भगव्याकडे वाकड्या नजरेने पाहण्याची हिंमत होता कामा नये, असं ते म्हणाले.

Nikita Wagde
the authorNikita Wagde

Leave a Reply