News

काँग्रेसला फक्त पैशाची भाषा कळते!: जेटली

18Views

नवी दिल्ली:

राफेल करारातील कथित घोटाळ्याच्या मुदद्यावरून संसदेत आज काँग्रेस-भाजपमध्ये जोरदार खडाजंगी झाली. अनिल अंबानींच्या फायद्यासाठीच राफेल करार झाल्याचा दावा करणाऱ्या राहुल गांधी यांच्यावर केंद्रीय अर्थमंत्री अरुण जेटली यांनी जोरदार हल्ला चढवला. ‘राहुल गांधी हे खोटारडे आहेत. त्यांना देश आणि देशाच्या सुरक्षेचं महत्त्व कधीच कळणार नाही. त्यांना फक्त पैशाची भाषा समजते,’ असा घणाघाती आरोप जेटली यांनी केला.

लोकसभेत राफेल करारावर झालेल्या चर्चेत भाग घेताना राहुल गांधी यांनी मोदी सरकारवर पुन्हा एकदा आरोप केले. काँग्रेसनं नुकत्याच प्रसिद्ध केलेल्या एका ऑडिओ टेपचाही त्यांनी उल्लेख केला. गोव्याचे मुख्यमंत्री मनोहर पर्रिकर यांच्याकडं राफेलची सर्व गुपितं आहेत, असं राहुल म्हणाले. तसंच, या कराराची संसदीय समितीकडून चौकशी करण्याची मागणी केली. जेटली यांनी राहुल गांधींचे सगळे आरोप खोडून काढले. ‘गेल्या सहा महिन्यापासून राफेल कराराविरोधात उच्चारला गेलेला प्रत्येक शब्द खोटा आहे. सर्वोच्च न्यायालयानंही त्यावर शिक्कामोर्तब केलंय. राहुल गांधींचे सर्व आरोप न्यायालयानं फेटाळून लावले आहेत. आपल्याकडं सर्वोच्च न्यायालयाचा निकाल अंतिम मानला जातो. मात्र, राहुल न्यायालयाचाही अवमान करत आहेत. काही लोकांना सत्याचा मुळातच तिटकारा असतो, असा टोलाही त्यांनी राहुल यांना हाणला.

जेटलींच्या भाषणातील ठळक मुद्दे:

>> मनोहर पर्रिकरांच्या वक्तव्याचा हवाला देऊन काँग्रेसनं प्रसिद्ध केलेली ऑडिओ टेप बनावट आहे. त्यात अजिबात तथ्य नाही.

>> राफेल विमानं ही देशाची गरज आहे. कारगील युद्धानंतर हवाई दलानं अत्याधुनिक विमानाची मागणी केली होती. त्या गरजेपोटीच ही विमानं घेतली जात आहेत.

>> यूपीए सरकारला राफेलचा करार पूर्ण करता आला नाही. त्यांनी देशाच्या सुरक्षेशी खेळ केला.

>> राहुल गांधी यांना लढाऊ विमानातलं काही कळतही नाही. त्यांना देशाच्या सुरक्षेचं महत्त्व कळणार नाही. त्यांना फक्त पैशाचा व्यवहार समजतो.

>> राफेल करार हा दोन देशांच्या सरकारमधील करार आहे. त्यासाठी आवश्यक प्रक्रियेचा अवलंब करण्यात आला आहे. सर्वोच्च न्यायालयानंही त्यावर समाधान व्यक्त केलंय.

>> एनडीए सरकारनं केलेला करार हा यूपीएच्या करारापेक्षा ९ टक्क्यांनी स्वस्तात झाला आहे. त्यासाठी तब्बल ७४ बैठका झाल्या.

>> ऑफसेट भागीदाराची निवड दसॉल्ट कंपनीनं केली आहे. काँग्रेसला या करारातील ऑफसेट क्लॉज समजलेलाच नाही.

Nikita Wagde
the authorNikita Wagde

Leave a Reply