News

कोट्यवधींचे ड्रग्जनिर्मिती रसायन हस्तगत

14Views

मुंबई :-

ड्रग्ज बनवण्यासाठी परदेशात छुप्या मार्गाने पाठवण्यात येणाऱ्या रसायनांचा मोठा साठा मुंबई पोलिसांच्या अंमली पदार्थविरोधी पथकाच्या अधिकाऱ्यांनी जप्त केला आहे. हा साठा सुमारे शंभर किलो असून याची याची किंमत आंतरराष्ट्रीय बाजारपेठेत कोट्यवधी रुपये असल्याचे पोलिस सूत्रांनी सांगितले. याप्रकरणी पोलिसांनी चौघांना अटक केली असून याबाबत अधिक तपास सुरू असल्याचे पोलिसांनी म्हटले आहे.

अमेरिकेत बंदी असलेल्या आणि हजारो लोकांच्या मृत्यूचे कारण बनलेल्या पेन्टॅलिन या रसायनाची मुंबईतून मोठ्या प्रमाणात तस्करी होत असल्याची माहिती अंमली पदार्थविरोधी पथकाच्या अधिकाऱ्यांना मिळाली. या माहितीच्या आधारे अंमली पदार्थविरोधी पथकाच्या आझाद मैदान युनिटच्या अधिकाऱ्यांनी अंधेरी येथे छापा टाकून सलीम डोला, चंद्रमणी तिवारी, संदीप तिवारी, घनःश्याम तिवारी या चौघांना ताब्यात घेतले. या ठिकाणी त्यांच्याकडे पेन्टॅलिन हे रसायन सापडले. पेन्टॅलिनचा इतक्या मोठ्या प्रमाणावर कशासाठी साठा करून ठेवला याबाबत त्यांच्याकडून समाधानकारक उत्तर मिळू शकले नाही. पोलिसांनी सुमारे शंभर किलो रसायन त्यांच्याकडून हस्तगत केले असून औषध बनवण्याच्या एखाद्या कंपनीतून हे रसायन येत असल्याची शक्यता पोलिसांनी व्यक्त केली आहे. अटक करण्यात आलेल्या चौघांनी या रसायनाचा साठा करण्याचा परवाना असल्याचा दावा केला आहे.

महानगर दंडाधिकारी न्यायालयाने या चौघांना १ जानेवारी २०१९पर्यंत पोलिस कोठडी सुनावली आहे. ‘थर्टी फर्स्ट’च्या पार्श्वभूमीवर एवढी मोठी कारवाई करण्यात आल्याने अंमली पदार्थ तस्करांचे धाबे दणाणले आहेत

Nikita Wagde
the authorNikita Wagde

Leave a Reply