News

जालन्याचा तिढा सुटला, खोतकर यांची माघार.

7Views

औरंगाबाद:

भाजप प्रदेशाध्यक्ष रावसाहेब दानवेयांच्या विरोधात जालना येथून लोकसभा निवडणूक लढवण्याची गर्जना करणारे शिवसेना नेते अर्जुन खोतकर यांनी अखेर माघार घेतली आहे. त्यामुळं आता जालन्याचा तिढा सुटला असून, दानवे यांचा निवडणूक लढवण्याचा मार्ग मोकळा झाला आहे.

दानवे यांच्या विरोधात जालन्यातून निवडणूक लढवण्यावर खोतकर ठाम होते. भाजप-शिवसेना युतीची घोषणा झाल्यानंतर ते माघार घेतील, अशी चर्चा होती. मात्र, खोतकर यांनी युती झाल्यानंतरही निवडणूक लढवणार असल्याचा निर्धार बोलून दाखवला होता. त्यामुळं भाजपच्या गोटामध्ये चिंतेचं वातावरण निर्माण झालं होतं. हा तिढा सोडवण्यासाठी वरिष्ठ पातळीवरून हालचाली सुरू होत्या. अखेर हा जालन्याचा तिढा सोडवण्यात वरिष्ठांना यश आलं आहे. अखेर दानवे आणि खोतकर यांच्यात दिलजमाई झाली आहे. आपण निवडणुकीतून माघार घेत असल्याचं खोतकर यांनी औरंगाबादमधील युतीच्या मेळाव्यात जाहीर केलं. ‘शिवसेना पक्षप्रमुख उद्धव ठाकरे आणि मुख्यमंत्री देवेंद्र फडणवीस यांनी युतीचा धर्म समजावून सांगितला. उद्धव ठाकरे यांचा आदेश माझ्यासाठी अंतिम आहे. त्यामुळं आपण माघार घेत आहोत. युतीचं काम करणार असून, देतील ती जबाबदारी पार पाडणार आहे. मी कडवट सैनिक असून, दगाफटका करणार नाही. पक्षप्रमुखांचा आदेश अंतिम मानून हा निर्णय घेतला आहे. त्यामुळे दानवे यांना रान मोकळे आहे,’ असं खोतकर म्हणाले.

भाजप-शिवसेना युतीच्या मेळाव्यात मुख्यमंत्री फडणवीस आणि उद्धव ठाकरे यांनीही उपस्थित कार्यकर्त्यांना मार्गदर्शन केलं. भाजप आणि शिवसेना युतीप्रमाणे अर्जुन खोतकर आणि रावसाहेब दानवे यांचाही फेविकॉलचा मजबूत जोड आहे, असं फडणवीस म्हणाले. तर मराठवाड्यातील आठही जागांवर युतीचे उमेदवार निवडून येतील, असा विश्वास त्यांनी व्यक्त केला. आपली युती फुलांसारखी सदैव टवटवीत ठेवणं आणि जनतेला त्याचा सुगंध देणं ही आपली जबाबदारी आहे, असं शिवसेना पक्षप्रमुख उद्धव ठाकरे यावेळी म्हणाले.

Nikita Wagde
the authorNikita Wagde

Leave a Reply