News

दीपा वर्ल्डकपमधून बाहेर.

9Views
बाकु (अझरबैजान) :-
भारताची आघाडीची जिम्नॅस्ट दीपा कर्माकरचे येथे सुरू असलेल्या वर्ल्डकपमध्ये पदक जिंकण्याचे स्वप्न गुडघेदुखापतीमुळे उद्ध्वस्त झाले. आर्टिस्टिक्स जिम्नॅस्टिक्सच्या व्हॉल्ट प्रकाराच्या अंतिम फेरीत तिला गुडघेदुखीचा त्रास जाणवू लागला आणि तिला माघार घ्यावी लागली. या दुखापतीमुळे तिला पुढील आठवड्यात होत असलेल्या दोहा वर्ल्डकपमध्ये सहभागी होता येणार नाही तसेच २०२०च्या टोकियो ऑलिम्पिकमध्ये सहभागी होण्याच्या प्रयत्नांवरही पाणी फेरले जाण्याची शक्यता निर्माण झाली आहे.

त्रिपुराच्या या खेळाडूने व्हॉल्टच्या पात्रता फेरीत १४.४६६ आणि १४.१३३ गुणांची कमाई करून एकूण १४.२९९ गुणांसह तिने अंतिम फेरीत धडक मारली होती. पहिल्या फेरीत उडी मारल्यानंतर तिला दुखापत जाणवू लागल्याने तिने माघार घेतली.

भारतीय जिम्नॅस्टिक्स फेडरेशनचे उपाध्यक्ष रियाझ भाटी म्हणाले की, आजच्या अंतिम फेरीपूर्वीच तिच्या गुडघ्याला त्रास जाणवत होता. मात्र फिजिओकडून व्यायाम घेतल्यानंतर तिला बरे वाटत होते. व्हॉल्टच्या अंतिम फेरीतील पहिल्या प्रयत्नात तिला वेदना जाणवली. त्यामुळे दुसरा व्हॉल्ट तिने केला नाही. त्यामुळे या स्पर्धेतील तिचे आव्हान संपुष्टात आले. आता ती भारतात परत येऊन उपचार घेईल. पण आशियाई आणि जागतिक अजिंक्यपद स्पर्धेत खेळण्याचा तिचा प्रयत्न असेल. यातील जागतिक स्पर्धेद्वारे ती ऑलिम्पिकसाठी प्रयत्न करू शकते.

पण दोन वर्ल्डकप हे ऑलिम्पिकसाठी पात्रता स्पर्धा म्हणून पाहिले जात होते. आता आशियाई स्पर्धा १३ ते १६ जूनला मंगोलियात होत आहे तर जागतिक स्पर्धा ४ ते १३ ऑक्टोबरमध्ये जर्मनीत होईल.

गेल्या वर्षी नोव्हेंबरमध्ये तिने जर्मनीत झालेल्या वर्ल्डकपमध्ये ब्राँझ जिंकले होते. त्यामुळे तिचे ऑलिम्पिक स्वप्न पूर्ण होईल, याची खात्री वाढली होती. पण पुन्हा एकदा तिच्या गुडघेदुखीने उचल खाल्ली आहे. रिओनंतर खरे तर तिच्या या दुखापतीला सुरुवात झाली होती. त्यानंतर मुंबईत तिच्या गुडघ्यावर शस्त्रक्रियाही झाली.

Nikita Wagde
the authorNikita Wagde

Leave a Reply