News

देशाचा चौकीदार चोर; राहुल गांधी यांची बोचरी टीका.

11Views

रांची: –

‘सर्व चौकीदार हे काही चोर नाहीत; पण केवळ ‘देशाचा चौकीदार’ चोर आहे,’ अशी बोचरी टीका काँग्रेसचे अध्यक्ष राहुल गांधी यांनी शनिवारी केली. काँग्रेसच्या रॅलीमध्ये ते बोलत होते. ‘हवाई दल देशाचे रक्षण करते; मात्र मोदी यांनी तीस हजार कोटी रुपये चोरून ते अंबानींना दिले,’ असा आरोपही त्यांनी राफेल कराराचा संदर्भ देऊन केला.

राहुल म्हणाले, ‘आपल्याकडे सर्व चौकीदार येऊन ‘चौकीदार चोर है’ या घोषणेबाबत तक्रार करतात. आम्ही चोर नाहीत, असा निर्वाळा ते देतात. तुम्ही घोषणा बदला, अशीही विनंती ते मला करतात. मी त्यांना काळजी न करण्याचे सांगतो. सर्व देशाला माहीत आहे, की ‘चौकीदार चोर है’ ही घोषणा पंतप्रधान नरेंद्र मोदी यांना उद्देशून केलेली आहे.’ राहुल यांनी या वेळी राफेल करारावरूनही मोदी यांना लक्ष्य केले. ते म्हणाले, ‘हवाई दल देशाचे संरक्षण करते. परंतु, पंतप्रधान नरेंद्र मोदी यांनी दलाकडून तीस हजार कोटी चोरले. राफेल व्यवहारात मोठा भ्रष्टाचार झाला असून अनिल अंबानी यांना तीस हजार कोटी रुपये चुकीच्या पद्धतीने देण्यात आले आहेत.’ पंतप्रधान मोदी यांनी ३.५ लाख कोटी रुपयांचा उद्योगपतींचा कर्ज माफ केले. पण, शेतकरी, विद्यार्थी आणि दुकानदारांचे कर्ज माफ केले नसल्याचा आरोपही गांधी यांनी या वेळी केला. आगामी काळात काँग्रेस सत्तेत आली तर, सर्वांना किमान हमी रक्कम मिळेल आणि ते पैसे थेट गरिबांच्या खात्यात जमा केले जातील, असेही ते म्हणाले.

आर्थिक विकासावरून टीका

नवी दिल्ली : चालू आर्थिक वर्षाच्या तिसऱ्या तिमाहीत आर्थिक विकास घटल्याबद्दल राहुल यांनी मोदींना लक्ष्य केले. राहुल यांनी ट्विट केले, ‘चुकीची आश्वासने, चुकीच्या खेळी. चौकीदाराला तिमाहीमध्ये पुन्हा एकदा अपयश आले.’ डिसेंबर २०१८च्या शेवटच्या तिमाहीत भारताचा विकासदर ६.६ टक्क्यांवर आल्याच्या वृत्तावर त्यांनी भाष्य केले. ‘पंतप्रधानांचा कार्यकाळ संपत आला असून सर्व प्रकारचा गोंधळ करूनही अर्थव्यवस्था खालावत चालली आहे,’ असे ट्विट काँग्रेसने केले होते. पी. चिदंबरम यांनीही अर्थव्यवस्थेवरून टीका केली आहे.

Nikita Wagde
the authorNikita Wagde

Leave a Reply