News

नवी दिल्ली भारतीय जनता पक्ष देशात उन्मादी राष्ट्रवादी वातावरण तयार करीत आहे:-राहुल गांधी.

6Views

 नवी दिल्ली:-

भारतीय जनता पक्ष देशात उन्मादी राष्ट्रवादी वातावरण तयार करीत आहे, असा आरोप काँग्रेसचे अध्यक्ष राहुल गांधी यांनी गुरुवारी येथे पत्रकार परिषदेत केला. बेरोजगारी, शेतकऱ्यांचे उत्पन्न घटणे आणि प्रचंड अपयश या समस्यांपासून लक्ष भरकटवण्यासाठीच भाजप उन्मादी राष्ट्रवाद पसरवत आहे, असे राहुल म्हणाले.

हवाई दलाने २६ फेब्रुवारीला पाकिस्तानातील बालाकोट येथे केलेल्या हवाई हल्ल्याचा वापर भाजप प्रचारात करेल, अशी चिन्हे असल्याची चर्चा आहे. या पार्श्वभूमीवर राहुल यांनी वरील आरोप केला.

आपल्याला महात्मा गांधींचा भारत हवा की नथुराम गोडसेंचा भारत हवा, याचा निर्णय आगामी निवडणुकीत घ्यायचा आहे, असे सांगून राहुल म्हणाले, ‘पंतप्रधान मोदी द्वेष पसरवतात. त्यांचे राजकारण द्वेषमूलक आणि त्यापोटी जबर नुकसान सहन करायला लावणारे आहे.’ आगामी निवडणुकीत काँग्रेसप्रणीत संयुक्त पुरोगामी आघाडीला स्पष्ट बहुमत मिळेल, असा दावाही राहुल यांनी केला. गेल्या निवडणुकीत यूपीएला आजवरच्या नीचांकी ४४ जागा मिळाल्या होत्या.

पत्रकारांनी विचारलेल्या राफेल विमानखरेदीपासून ते अर्थकारणापर्यंतच्या विविध प्रश्नांना राहुल यांनी उत्तरे दिली.

ते म्हणाले, ‘राफेल करार हा भ्रष्टाचाराच्या हिमनगाचे फक्त टोक आहे. मोदींनी संरक्षण खात्याची रक्कम कशा प्रकारे आपल्या मित्रांना दिली, याचे ते उदाहरण आहे. यातील तथ्य आज ना उद्या पुढे आलेले आपल्याला दिसेल. असे अनेक करार आहेत. त्यांच्याबाबतीत तपास झालेला नाही किंवा कोणी प्रश्नही विचारलेला नाही.’

सध्या बेरोजगारी आणि शेतीची समस्या उग्र बनल्याचे सांगून राहुल म्हणाले, ‘ज्या देशाला आरथिक विकास साधायचा आहे, नवे रोजगार तयार करायचे आहेत, त्या देशात द्वेष पसरणे आणि ध्रुवीकरण होणे परवडणारे नसते. तमोदी द्वेष पसरवतात.’

आम्ही दिलेले किमान रोजागाराचे आश्वासन गेम चेंजर ठरेल, असा विश्वासही राहुल यांनी व्यक्त केला. ते म्हणाले, ‘हाच एकमेव उपाय असेल असे नाही, पण निदान सध्याच्या परिस्थितीत अडचणींचा भार हलाक करण्यासाठी त्याचा उपयोग होईल. आम्ही या कल्पनेवर फार पूर्वीपासून विचार करीत आहोत. कोणीह भारतीय एका विशिष्ट उत्पन्नमर्यादेच्या खाली जगता कामा नये, अशी ही कल्पना आहे.’

काँग्रेसला मत म्हणजे अनागोंदीला मत असा प्रचार भाजप करीत आहे, त्याविषयी राहुल म्हणाले, ‘मोदी देशावर जे लादू पाहात आहेत, ते हास्यास्पद आहे. नोटाबंदी पूर्ण अपयशी ठरलेली असताना ती चांगली कशी असेल? जीएसटीचे पाच दर कुठल्या व्यवहारात हे बसते? आम्हाला असले नियम नकोत.’

वाढत्या बेरोजगारीवर उपाय शोधण्यात यूपीए सरकारलाही अपयश आले होते, ही बाब मान्य करून राहुल म्हणाले, पण मोदींनी नोटाबंदी आणि चुकीच्या पद्धतीने जीएसटी आणून परिस्थिती चिघळवली. अनिल अंबानींसारख्यांना मोकळे रान देऊन त्यांनी उन्मत्त भांडवलशाही पोसली.

पंतप्रधानपद जनतेच्या हाती…

पंतप्रधान होण्याबाबत विचारले असता राहुल म्हणाले, ‘मला पंतप्रधानपद द्यायचे की नाही हे देशातील जनतेने ठरवायचे आहे. सध्यातरी भाजपच्या विचारधारेविरुद्ध लढणे आणि त्यात विजय मिळवणे हेच माझे काम आहे.’ ‘आमची आघाडी एकजुटीने मोदींना विरोध करीत आहे. महाराष्ट्र, तमिळनाडू, बिहार, झारखंड, जम्मू आणि काश्मीर, आसाम, या ठिकाणी आमची सहकारी पक्षांबरोबर दृढ आघाडी आहे,’ असे ते म्हणाले.

त्रिचूर (केरळ) : शेतकरी, मच्छीमार, छोटे उद्योजक यांच्या तक्रारींकडे पंतप्रधान दुर्लक्ष करतात. सध्याचे एनडीए सरकार फक्त अनिल अंबानी आणि नीरव मोदीसारख्या उद्योगपतींचेच ऐकते, अशी टीका काँग्रेसचे अध्यक्ष राहुल गांधी यांनी गुरुवारी येथे केली. ऑल इंडिया फिशरमन काँग्रेसच्या वतीने त्रिप्रयर येथे मच्छीमार संसद भरविण्यात आली होती. त्यात राहुल गांधी बोलत होते. ‘सध्याच्या सरकारमध्ये फक्त अनिल अंबानी, नीरव मोदी यांच्यासारख्यांचेच ऐकले जाते. त्यांनी सांगितलेल्या गोष्टी पंतप्रधान १० सेकंदात करतात. मात्र, मोठ्याने ओरडूनही शेतकरी, मच्छीमार, छोटे उद्योजक यांचा आवाज मोदींपर्यंत पोहोचत नाही. सगळे अप्रामाणिक लोक मोदींभोवती गोळा झाले आहेत. आमची लढाई काँग्रेस विरुद्ध मोदी अशी आहे.’ काँग्रेस सत्तेत आल्यास मच्छीमारांसाठी वेगळे मंत्रालय स्थापन केले जाईल, असे आश्वासनही राहुल यांनी दिले.

Nikita Wagde
the authorNikita Wagde

Leave a Reply