News

बुलेट ट्रेनवर सव्वा लाख कोटी रुपये खर्च करण्यापेक्षा लोकल सुधारा:- शरद पवार.

9Views

मुंबई:- 

पादचारी पूल कोसळून झालेली दुर्घटना हा मुंबईकरांच्या चिंतेचा विषय आहे. त्यामुळे बुलेट ट्रेनवर सव्वा लाख कोटी रुपये खर्च करण्यापेक्षा हा पैसा उपनगरी रेल्वे सेवा सुधारण्यासाठी करण्यात यावा, अशी आग्रही मागणी राष्ट्रवादी काँग्रेसचे अध्यक्ष खा. शरद पवार यांनी शुक्रवारी केली आहे. दिल्लीच्या धर्तीवर मुंबईतील सार्वजनिक वाहतुकीचा प्रश्न सोडविण्याच्या कामाला प्राधान्य दिले पाहिजे. तसेच मुंबईतील पुलांच्या अवस्थेबाबत श्वेतपत्रिका काढण्याची गरज असल्याचे पवार यांनी सांगितले.

पूल अपघात मुंबईकरांच्या दृष्टीने चिंतेचा विषय आहे. या पुलाचे ऑडिट व्यवस्थित झाले होते काय, त्याचीच चौकशी करण्याची गरज आहे. या शहरात वाहतुकीची व्यवस्था सुधारण्यासाठी रेल्वे मंत्रालयासह केंद्र सरकारने गांभीर्याने बघायला हवे. दिल्लीत मेट्रो केली आहे, त्याच धर्तीवर मुंबईतील वाहतुकीचा प्रश्न सोडविण्यास प्राधान्य दिले पाहिजे, असे स्पष्ट करतानाच, सव्वा लाख कोटी रुपयांच्या मुंबई-अहमदाबाद बुलेट ट्रेनला शरद पवार यांनी विरोध केला.

मुंबई ही देशाची आर्थिक राजधानी असून, या राजधानीत विरार ते चर्चगेट, कर्जत, कसारा ते सीएसएमटी या मार्गावर दररोज एक कोटी लोक प्रवास करीत असतात. या मार्गावर दररोज १५ ते २० अपघात होत असतात. वर्षाकाठी तीन हजार लोकांचा मृत्यू तर महिन्याला दोन ते तीन हजार प्रवासी जखमी होत असतात. प्रवाशांच्या सुरक्षेच्या दृष्टीने आमूलाग्र बदलाची गरज आहे. प्रथम रेल्वे स्टेशनांची सुधारणा करावी, असे पवार म्हणाले.

कोपरी पुलाबाबत पत्र
ठाणे येथील कोपरी पुलाच्या दुरवस्थेबाबत मध्य रेल्वेने ५ नोव्हेंबर २०१५ रोजी राज्य सरकारला दिलेल्या पत्राची प्रत शरद पवार यांनी पत्रकार परिषदेत वाचून दाखविली. मध्य रेल्वेच्या त्या पत्रानंतरही राज्य सरकार अथवा ठाणे महापालिकेने हा विषय गांभीर्याने घेतला नाही, याबद्दल पवार यांनी नाराजी व्यक्त केली.

Nikita Wagde
the authorNikita Wagde

Leave a Reply