News

भाजपला राष्ट्रभक्ती शिकवण्याचा अधिकार कोणी दिला:राज ठाकरे.

8Views

मुंबई :-

निवडणुका जिंकण्यासाठी सत्ताधारी भाजप युद्धसदृश्य परिस्थिती निर्माण करण्याचा प्रयत्न करीत असल्याचा आरोप करुन भाजपला राष्ट्रभक्ती शिकवण्याचा अधिकार कोणी दिला असा थेट सवाल मनसेचे अध्यक्ष राज ठाकरे यांनी केला आहे. लोकसभा निवडणुकीत मनसे नेमकी काय भूमिका घेणार हे राज ठाकरे यांनी गुलदस्‍त्‍यात ठेवले.

महाराष्ट्र नवनिर्माण सेनेच्या १३ व्या वर्धापन दिनानिमित्त वांद्रे येथील रंगशारदा सभागृहात शनिवारी आयोजित केलेल्या मेळाव्यात मनसेचे अध्यक्ष राज ठाकरे यांनी पंतप्रधान नरेंद्र मोदी, भाजपचे राष्ट्रीय अध्यक्ष अमित शहा, राष्ट्रीय सुरक्षा सल्लागार अजित डोवाल यांच्यावर सडकून टीका केली. २०१५ साली भाजप देशात युद्धसदृश्य परिस्थिती निर्माण करील असे आपण केलेले भाकित खरे ठरले, असा दवा त्यांनी केला

काश्मीरच्या पुलवामा जिल्ह्यात केंद्रीय राखीव पोलिस दलाच्या जवानावर झालेल्या हल्यावर राज ठाकरे यांनी प्रश्नचिन्ह उपस्थित केले. लोकसभा निवडणुकीच्या ऐन मध्यावर पुलवामासारखा दहशतवादी हल्ला घडवून आणला जाईल, असा दावा राज ठाकरे यांनी केला.

गेल्या २६ फेब्रुवारी रोजी आपल्या भारतीय हवाई दलाने पाकिस्तानमधील बालाकोटच्या दहशतवादी तळांवर हल्ला करून, त्या हवाई दलाने त्यांचे काम चोख बजावले याबद्दल काहीच वाद नाही. पण त्यांना दहशतवादी तळांची चुकीची माहिती देण्यात आली आहे. या हल्ल्यानंतर खोटे फोटो व्हायरल करण्यात आले, असा दावाही राज ठाकरे यांनी केला.

जर खरोखरच पाकिस्तानात दोनशे ते चारशे दहशतवादी मारले गेले असते तर भारतीय हवाई दलातील वैमानिक अभिनंदन यांना पाकिस्तानने सुखासुखी सोडले असते काय, असा सवालही राज ठाकरे यांनी केला. अडीचशे, तीनशे दहशतवादी मारले गेले असा दावा भाजप अध्यक्ष अमित शहा करतात. हल्ला करायला गेलेल्या विमानाचे ते सहवैमानिक होते काय असा खोचक सवाल राज ठाकरे यांनी केला.

पुलवामाचा हल्ला नेमका निवडणुकीच्या तोंडावर कसा घडला. असा हल्ला घडणार आहे हे गुप्तचर यंत्रणांनी आधीच सांगितले गेले होते. सीआरपीएफच्या जवानांना रस्ता मार्गे न नेता हवाई मार्गाने नेण्यात यावे असेही सुचविण्यात आले होते. मग हे घडल्यानंतर आम्ही प्रश्न अथवा शंका उपस्थित करायचे नाही का, असा सवाल राज ठाकरे यांनी केला.

हे कसले फकीर?

पुलवामाचा हल्ला १४ फेब्रुवारी रोजी झाला. त्यात ४०हून अधिक जवान शहीद झाले. त्या जवानांच्या कुटुंबांना उद्धवस्त करणाऱ्या या घटनेमुळे सारा देश शोकमग्न होता. तथापि, पंतप्रधान नरेंद्र मोदी हे त्यानंतरच्या दिवसात अगदी अप टू डेट स्टायलीश वेश परिधान करुन फिरत होते असे सांगत हे कसले फकीर तर हे बेफिकीर, अशी कोटी राज ठाकरे यांनी केली.

‘डोवालपुत्राची पाक नागरिकाशी भागिदारी’

राष्‍ट्रीय सुरक्षा सल्‍लागार अजित डोवाल याच्या मुलाच्या कंपनीत एक अरब तर एका पाकिस्‍तानी माणसाची भागीदारी असल्याचा गंभीर आरोप राज ठाकरे यांनी केला. इतर कोणाची पाकिस्‍तानी नागरिकासोबत भागिदारी असती तर त्‍याला लगेच यांनी देशद्रोही ठरवले असते असे ते म्हणाले. लष्‍करातील जवानांपेक्षा व्यापारी हे जास्‍त साहसी असतात असे बोलत असतानाची पंतप्रधान नरेंद्र मोदी यांची एक क्‍लिपही राज ठाकरे यांनी यावेळी दाखविली. देशाच्या सीमेवर लढणाऱ्या जवानांपेक्षा व्यापाऱ्यांचे साहस मोठे असू शकते? असे देशाचा पंतप्रधान म्‍हणूच कसे शकतो असा सवालही राज ठाकरे यांनी यावेळी केला.

Nikita Wagde
the authorNikita Wagde

Leave a Reply