News

भाजप कार्यकर्त्यांनी घेतला छडीचा धसका!

23Views

नागपूर :-
‘फिर एक बार, मोदी सरकार’ अशा घोषणेसह भाजप येत्या वर्षातील लोकसभा निवडणुकीसाठी सज्ज झाला आहे. एकीकडे सोशल मीडियावर पक्षाचे कॅम्पेन सुरू झाले आहे तर दुसरीकडे कार्यकर्त्यांसाठी विविध कार्यक्रम-उपक्रमांची रूपरेषा तयार झाली आहे. पक्ष मजबूत करण्याचे काम मोदी सरकार केंद्रात सत्तेत आल्यापासूनच सुरू झाले. मात्र चार-साडेचार वर्षांपूर्वीची पक्षाची मजबूत स्थिती आणि आजची निवडणुकीला सामोरे जातानाची स्थिती बदलली आहे. देशातील तीन महत्त्वाच्या राज्यांनी दिलेल्या निकालाने या परिस्थिती बदलावर शिक्कामोर्तब केले. या पार्श्वभूमीवर पक्ष अधिक आक्रमक झाला आहे. विविध कार्यक्रम-उपक्रमांच्या माध्यमातून पक्षाने उगारलेल्या छडीचा कार्यकर्त्यांनी मात्र धसका घेतला आहे.

पाच वर्षांपूर्वी केंद्र व राज्यात भाजपची सत्ता यावी, या ध्यासातून कार्यकर्ते कामाला लागले होते. कोणत्याही स्थितीत पक्षाला चांगले दिवस आणण्यासाठी अहोरात्र परिश्रम घेतले. केंद्रात सत्ता आल्यानंतरही जगातील सर्वात मोठा राजकीय पक्ष करण्यासाठी सुरू झालेले कार्यक्रम ऐरणीवर आले. महासदस्य अभियान, सदस्यांना प्रशिक्षणासाठी महाप्रशिक्षण, या सदस्यांनी नागरिकांशी संवाद साधावा म्हणून महाजनसंपर्क अभियान राबवण्यात आले. या काळात प्रशिक्षण व लहान-मोठे कार्यक्रमही बरेच घेण्यात आले. ‘घर चलो अभियान’, विस्तारकांच्या माध्यमातून नव्याने जनसंवाद, बुथ व मंडळ पातळीवरील कार्यकर्त्यांचे मेळावे, महात्मा गांधी यांच्या दीडशेव्या जयंतीनिमित्त पदयात्रा व परत जनसंपर्क या सर्व अभियानांत कार्यकर्त्यांना सक्रिय सहभाग नोंदवावा लागला.

पक्षाच्या कार्यक्रमाखेरीज मंत्री, खासदार, आमदार व स्थानिक नेत्यांचे कार्यक्रमही असतात. त्यातही कार्यकर्त्यांना सक्रिय सहभाग द्यावा लागतो. ‘परिवारा’तील कार्यक्रमातही योगदान द्यावे लागते. विश्व हिंदू परिषदेने हुंकार सभा आयोजित केली तरी, त्याच्या यशामागे भाजप कार्यकर्त्यांचे हात लागले होते. बुथ व पेज प्रमुखांचा मेळावा, भाजपचे झेंडा व स्टिकर लावणे, महापुरुषांची जयंती व पुण्यतिथीचे कार्यक्रम, पक्षाचे सर्व मोर्चे सक्रिय करणे, शक्ती केंद्र प्रमुखांचा मेळावा आदी कार्यक्रमांसाठी कार्यकर्त्यांची ओढाताण होत आहे.

भाजपचे प्रदेशाध्यक्ष रावसाहेब दानवे आणि संघटन सचिव विजय पुराणिक यांनी राज्यातील सर्व लोकसभा मतदारसंघातील कार्यकर्त्यांना कार्यक्रमांचे कॅलेंडर देणे सुरू केले. पक्षाची शक्ती दाखवून देण्यासाठी लोकसभा निवडणुकीपूर्वी देशभरात येत्या २ मार्च रोजी एकाच दिवशी एकाच वेळी प्रत्येक बुथवरील पाच कार्यकर्त्यांच्या बाइक रॅली काढण्यात येणार आहे. येत्या निवडणुकीत मतदारांना मतदान केंद्रापर्यंत नेण्यासोबतच इतर कार्यक्रमांवरही भर देण्यात आला आहे.

कार्यक्रमाची रूपरेषा दिल्लीवरून आली आणि त्याबरहुकूम अंमलबजावणी व्हावी अशी पक्षनेत्यांची अपेक्षा असली, तरी स्थानिक पातळीवर कार्यक्रमांच्या रूपरेषेत फेरबदल करणे वा ठराविक कालावधी कमी करणे असेही प्रकार सुरू आहेत. प्रत्येक शहर वा मतदारसंघाची स्थिती व मुद्दे वेगळे असल्याने असे बदल करण्यात येत असल्याचे एका नेत्याने सांगितले. अनेक कार्यकर्त्यांना निवडणुकीपूर्वी दिलेली आश्वासने पूर्ण झालेली नाहीत. एखादे पद अद्याप मिळालेले नाही. सर्वत्र सत्ता असताना त्याचा फायदा फक्त ‘राज दरबारी’ असणाऱ्या नेत्यांनाच मिळाला, कार्यकर्त्यांपर्यंत झिरपला नाही, याची सल कार्यकर्त्यांना बोचत आहे. मात्र नाराजीने का होईना सज्ज होण्याशिवाय कार्यकर्त्यांसमोर पर्याय नाही, याकडे एका नेत्याने लक्ष वेधले.

Nikita Wagde
the authorNikita Wagde

Leave a Reply