News

भारत-ऑस्ट्रेलिया दुसरी टी-२० आज.

51Views

 बेंगळुरू:-

फलंदाजांचे अपयश आणि हातातोंडाशी आलेली लढत अखेरच्या षटकांत गमावणाऱ्या भारताला घरच्या मैदानावर मालिका पराभव टाळायचा असेल, तर बुधवारी रंगणारी ऑस्ट्रेलियाविरुद्धच्या मालिकेतील दुसरी अन् अखेरची टी-२० जिंकावीच लागेल. बेंगळुरूतील चिन्नास्वामी स्टेडियमवर ही लढत रंगणार आहे. भारताच्या बरोबरीच्या प्रयत्नांना सुरुंग लावण्याचा पाहुणा ऑस्ट्रेलिया संघ सर्वप्रकारे प्रयत्न करेल.

विशाखापट्टणम येथे पार पडलेल्या पहिल्या टी-२०मध्ये दोन्ही संघांना फलंदाजीत मोठे यश मिळवता आले नव्हते. भारताने १२६ धावांचे माफक आव्हान उभारले तर याचा पाठलाग करताना ऑस्ट्रेलियाचीही दमछाक झाली होती. अखेरच्या चेंडूवर त्यांनी ही झुंज जिंकली. बेंगळुरूची खेळपट्टी मात्र फलंदाजीला पूरक असल्याने येथे चौकार, षटकारांची बरसात पाहायला मिळू शकते. पहिल्या सामन्यात भारताच्या केवळ लोकेश राहुलला अर्धशतक करता आले. डावाच्या अखेरच्या षटकांत फलंदाजीस येणाऱ्या महेंद्रसिंह धोनीलाही धावगती उंचवावी लागेल. त्याच्या कूर्मगतीने फलंदाजी करण्यावर टीका होते आहे. गोलंदाजीच्या आघाडीवर भारतीय गोलंदाजांची कामगिरी आश्वासक आहे. जसप्रीत बुमराह माराच प्रतिस्पर्ध्यांवर वचक बसवतो. पहिल्या सामन्यात भारताने यजुवेंद्र चहल, मनीष मर्कंडे आणि कृणाल पंड्या असे तीन फिरकी गोलंदाज खेळवले होते. दुसऱ्या सामन्यातही तीन फिरकीपटू खेळवण्याची शक्यता आहे.

दुसरीकडे, ऑस्ट्रेलियाच्या दृष्टीने कर्णधार अॅरॉन फिंचचे अपयश चिंताजनक आहे. विशाखापट्टणममधील सामन्यात फिंचला भोपळाही फोडता आला नव्हता. टी-२० मालिकेनंतर होणारी वनडे मालिका लक्षात घेता कामगिरी सुधारण्यासाठी फिंचला ही अखेरची संधी आहे.

दुसरी टी-२० : भारत वि. ऑस्ट्रेलिया

स्थळः चिन्नास्वामी स्टेडियम, बेंगळुरू

वेळ : सायंकाळी ७ पासून

खेळपट्टीचा अंदाज

विशाखापट्टणमच्या खेळपट्टीवर दोन्ही संघांना जेमतेम सव्वाशे धावांचा टप्पा ओलांडता आल्यानंतर बेंगळुरूमधील चिन्नास्वामीची खेळपट्टी फलंदाजीस पूरक असेल, असा अंदाज आहे. त्यामुळे दोन्ही संघांकडून या सामन्यात मोठी धावसंख्या उभारण्यात येऊ शकते. ही खेळपट्टी विजय हजारे स्पर्धेनंतर मागील दोन महिन्यांत वापरण्यात आली नसल्यामुळे ही खेळपट्टी संथ नसेल, असे कर्नाटक क्रिकेट संघटनेच्या पदाधिकाऱ्यांनी सांगितले.

पहिल्या सामन्यात भारताची गोलंदाजीतील कामगिरी चांगली होती. इतके कमी लक्ष्य असूनही आपण अखेरच्या चेंडूपर्यंत लढत दिली. आता आपल्याला फलंदाजीबाबत अधिक सावध राहावे लागेल. आम्ही मालिकेत ०-१ ने पिछाडीवर असलो, तरी आम्ही आत्मविश्वास गमावलेला नाही. उद्याच्या सामन्यात आम्ही निश्चितच चांगली कामगिरी करू.

– कृणाल पंड्या, भारताचा अष्टपैलू

बुमराहची गोलंदाजी खरेच उल्लेखनीय आहे. चेंडू वेगवान आणि अचूक जागी टाकणे या दोन्ही गोष्टी बुमराह योग्यरीत्या करतो. जागतिक क्रिकेटमध्ये या गोष्टी साध्य करणारा कोणताही गोलंदाज हा फलंदाजांसाठी कठीण आव्हान असतो. त्याचप्रमाणे, ‘स्लो-बॉल’ टाकण्याचे कौशल्यही बुमराहने चांगल्याप्रकारे आत्मसात केले आहे. विशेष म्हणजे, तो तिन्ही प्रकारच्या क्रिकेटमध्ये चांगली कामगिरी करतो आहे.

– पॅट कमिन्स, ऑस्ट्रेलियाचा वेगवान गोलंदाज

मी यष्टीरक्षण करू शकतो. मला आता फक्त फिटनेस जपण्याकडे लक्ष द्यावे लागेल. वनडेत आम्ही प्रथम क्षेत्ररक्षण स्वीकारले, तर मला ५० षटके यष्टीरक्षण केल्यानंतरही चौथ्या-पाचव्या स्थानावर फलंदाजी करावी लागेल. टी-२० हा प्रकार वाईट नाही. हा सामना खूप कमी वेळात संपलो. वनडे तुलनेत कठीण असतात. त्यामुळेच मर्यादित षटकांच्या क्रिकेटमध्ये क्षमता सिद्ध करण्यास मी उत्सुक आहे.

– पीटर हँड्सकोम्ब, ऑस्ट्रेलियाचा यष्टीरक्षक

Nikita Wagde
the authorNikita Wagde

Leave a Reply