nagpurruralNews

भिडेंच्या कार्यक्रमावेळी जालन्यात लाठीमार

16Views

जालना:-

सध्याच्या घडीला देशात विकासाची कामे खूप चांगली चालू आहेत. मात्र, सर्वसामान्य नागरिकांना देशभक्ती शिकवण्याचे काम अतिशय गरजेचे आहे. त्याचा एकमेव मंत्र शिवाजी महाराज आणि संभाजी महाराज हाच आहे, असे प्रतिपादन शिवप्रतिष्ठानचे संभाजी भिडे यांनी रविवारी जालन्यात केले. दरम्यान, या कार्यक्रमाला काही संघटनांचा विरोध होता आणि त्यांनी कार्यक्रम उधळून लावण्याचा प्रयत्न केला. त्यावेळी पोलिसांनी सौम्य लाठीमार करत जमाव पांगवला.

राजगड ते रायगड धारातिर्थी यात्रा मोहिमेच्या प्रचारासाठी जालन्यातील आर्यसमाज भवनात आयोजित कार्यक्रमप्रसंगी बोलत होते. या कार्यक्रमात माध्यमांच्या प्रतिनिधींना मज्जाव करण्यात आला होता, तसेच भिडे यांनी माध्यमांसमोर येण्याचे टाळले. भिडे म्हणाले, ‘या देशातील सर्व नागरिक एकाच रक्ताचे आहेत. जाती पंथ भाषा हे सगळे भेद वरवरचे असून हे सगळे आपण लक्षात घेऊन काम करावे. छत्रपती शिवाजीराजे आणि छत्रपती संभाजीराजे यांच्या इतिहासाच्या विकृतीकरण करण्यासाठी काही दिवसांपासून लोक काम करत आहेत. त्यामुळे आपल्याच घरात आपण परदेशी झालो आहोत. आपला धर्म हा विश्व धर्म आहे.’ आर्य समाजाचे भैय्यालाल अहीर यांनी प्रास्ताविक केले. यावेळी ‘शिवप्रतिष्ठान’चे जालना, परभणी, बीड, औरंगाबाद येथील कार्यकर्ते उपस्थित होते.

संभाजी भिडे यांच्या जालन्यातील सभेवर बंदी घालण्यात यावी, अशी मागणी वंचित बहुजन आघाडी, संभाजी ब्रिगेड तसेच अन्य दलित संघटनेच्या वतीने करण्यात आली होती. या कार्यक्रमाचे ठिकाण संयोजकांना दोन वेळा बदलावे लागले. हा कार्यक्रम आर्य समाज भवनात होणार असताना रविवारी सकाळी साडेनऊ वाजण्याच्या सुमारास छत्रपती शिवाजी महाराजांच्या पुतळ्यापासून अचानकपणे पंधरा ते वीस मोटारसायकल दोन ठिकाणचा पोलिस बंदोबस्त तोडून आत आल्या. त्या वेळी पोलिसांनी सौम्य लाठीमार करून त्यांना पांगवले. या वेळी आंदोलकांनी अंडे फेकण्याचा प्रयत्न केला. मात्र, पोलिसांनी तो प्रयत्न पूर्णपणे उधळला.

११ जणांविरोधात गुन्हे दाखल

याच काळात नूतन वसाहत परिसरात असलेल्या डॉ. बाबासाहेब आंबेडकर यांच्या पुतळ्याजवळ आंदोलकांचा जमाव जमला होता. तिथे पोलिसांनी त्यांना ताब्यात घेतले. आर्यसमाज भवन परिसरात मोठा पोलिस बंदोबस्त ठेवण्यात आला होता. शहरातील ५० आंदोलकांना पोलिसांनी ताब्यात घेऊन चौकशी करून सोडले. ११ जणांविरोधात गुन्हे दाखल करण्यात आले असल्याची माहिती अप्पर पोलिस अधीक्षक समाधान पवार यांनी दिली.

Nikita Wagde
the authorNikita Wagde

Leave a Reply