News

महावितरण कर्मचाऱ्यांना शॉक

8Views

ठाणे:

वीजवितरण हानी एका महिन्यांत पाच टक्क्यांपर्यंत कमी केली नाही तर कर्मचाऱ्यांची वेतनवाढ रोखण्याचे आदेश ऊर्जामंत्री चंद्रशेखर बावनकुळेयांनी दिले आहेत. वागळे इस्टेट, कळवा आणि मुंब्रा-दिव्यातील वीजवितरण हानी अनुक्रमे १७, २६ आणि ५१ टक्के आहे. ही हानी चार टक्क्यांवर आणणे केवळ अशक्य आहे. कळवा, मुंब्र्यातील वीजवितरण व्यवस्थेच्या खासगीकरणाचे प्रयत्न सुरू असले तरी निवडणुकांच्या तोंडावर सुरू झालेला विरोध लक्षात घेता त्यात महावितरणला यश येणे अवघड आहे. ऊर्जामंत्र्यांचे आदेश, राजकीय आघाड्यांवरून खासगीकरणाला होत असलेला विरोध, वाढती वीजचोरी रोखण्यात येत असलेले अपयश आणि वीजग्राहकांचा असहकार यामुळे महावितरणच्या कर्मचाऱ्यांची भलतीच कोंडी झाली आहे.

वीजवितरण हानी कमी करण्यासाठी बावनकुळे यांनी महावितरणच्या कर्मचाऱ्यांचे वेतनवाढ रोखण्याचे आदेश भांडूप परिमंडळात झालेल्या एका बैठकीत दिले आहेत. या परिमंडळात ठाणे, वाशी आणि पेण हे तीन सर्कल मोडतात. त्यातली वीजहानी अनुक्रमे १५.१४, ६.४९ आणि ३.६४ टक्के आहे. पेण सर्कल येथे काम करणाऱ्या कर्मचाऱ्यांना या आदेशाचा फटका बसणार नाही. तर, वाशी सर्कलच्या कर्मचाऱ्यांनी आपल्या भागातील वीजहानी दीड टक्क्यांनी कमी केली तरी त्यांच्या वेतनवाढीवर आलेले गंडांतर टळू शकते. मात्र, ठाणे सर्कलची अवस्था बिकट आहे. ठाणे सर्कल येथे वागळे इस्टेट, भांडूप, मुलुंड आणि ठाणे एक, दोन, तीन असे सहा भाग येतात. त्यापैकी भांडुप (७), मुलुंड (८), ठाणे-एक (८), वागळे इस्टेट (१०) या चार विभागातली वीज हानी मर्यादेत आहे. तिथे ठोस प्रयत्न केले तर हानी कमी करणे शक्य होईल. मात्र, ठाणे दोनची हानी १७ टक्के असून त्यापैकी कळवा सब डिव्हिजनची हानी २६ टक्के आहे. तर, मुंब्रा, दिवा आणि शिळ या भागाचा समावेश असलेल्या ठाणे तीन या विभागातली वीजहानी तब्बल ५१ टक्के आहे.

महानगरांमध्ये वीजवितरण हानी जास्तीत पाच टक्क्यांपर्यंत असावी असा निकष आहे. मात्र, कळवा, मुंब्रा आणि दिवा या परिसरात वीजचोरी आणि वीजगळतीचे प्रमाण प्रचंड असल्याने तिथली वीजहानी नियंत्रणाबाहेर गेली आहे. वीजवितरण हानी कमी न झाल्यास संबधित विभागातील अधिकाऱ्यांना जबाबदार धरले जाईल, असेही महावितरणमधील वरिष्ठ अधिकाऱ्यांचे म्हणणे आहे. तसेच, ऊर्जामंत्र्यांच्या आदेशाचे पालन केले तर या भागात काम करणाऱ्या कर्मचाऱ्यांना पुढील वेतनवाढ मिळू शकणार नाही.

खासगीकरणाचा तिढा

कळवा, मुंब्रा, दिवा, शिळ या भागांतील वीजहानी कमी करण्यासाठी महावितरण गेल्या अनेक वर्षांपासून प्रयत्न करत आहे. मात्र, वीजचोरीचे प्रकार सुरूच असून असंख्य ग्राहक विजेची बिले अदा करत नाहीत. त्यामुळे महावितरणचा तोटा प्रचंड वाढला आहे. त्यामुळे या भागातील वीजपुरवठ्याचे खासगीकरण करण्याचा निर्णय महावितरणने घेतला आहे. त्यासाठी निविदा प्रक्रियेद्वारे टोराण्ट पॉवर या कंपनीची निवडही झाली आहे. मात्र, राष्ट्रवादी काँग्रेस आणि शिवसेनेने या खासगीकरणाला विरोध केला आहे. आगामी लोकसभा आणि निवडणुकांच्या तोंडावर हा विरोध तीव्र होण्याची चिन्हे आहेत. त्यामुळे खासगीकरणाच्या मार्गात मोठा अडथळा उभा ठाकण्याची चिन्हे आहेत. त्यात महावितरणचे कर्मचारीच भरडले जाण्याची शक्यता आहे.

मीटरचा तुटवडा

महावितरणचे अधिकारी कर्मचारी ठिकठिकाणी कारवाई करून वीजचोरी पकडतात. वीजचोरांविरुद्ध थेट गुन्हाही दाखल होत आहेत. मात्र, त्यानंतरही चोरीचे प्रमाण कमी होत नाही. हानी कमी करण्यासाठी जुने मीटर काढून नवीन मीटर बसविले जात आहेत. मात्र, ठाणे नागरी मंडळात पुरेसे मीटर उपलब्ध असल्याचे अधिकारी सांगतात.

अपुरे कर्मचारी

ठाणे, वाशी आणि पेण झोनमध्ये मंजूर कर्मचारीपदे ५ हजार ६३९ इतकी असून प्रत्यक्ष काम करणारे कर्मचारी ३ हजार ७९४ इतके आहेत. तब्बल १८४५ कर्मचाऱ्यांची पदे रिक्त असल्याची माहिती हाती आली आहे.

Nikita Wagde
the authorNikita Wagde

Leave a Reply