News

मुंबईत पुन्हा इमारतीला आग,१६ जवान जखमी

25Views

 मुंबई:-

मुंबईमध्ये आगीचे सत्र काही थांबण्याचे नाव घेत नाही. चेंबूरच्या सरगम सोसायटीला लागलेल्या आगीला दोन दिवस उलटत नाहीत तोवर शनिवारी वरळी येथील साधना इंडस्ट्रियल इस्टेटला आग लागली. या ठिकाणी औषधे, केमिकल, केबल्स आणि प्लास्टिकचा साठा असल्याने आग पेटण्याऐवजी धुमसली. यामुळे वरळी परिसरात सगळीकडे धुराचे लोट पसरले होते. आगीवर नियंत्रण मिळवताना श्वसनाचा त्रास जाणवू लागल्याने अग्निशमन दलाच्या १६ जवानांना रुग्णालयात दाखल करण्यात आले आहे

वरळी बीडीडीचाळींच्या पुढे असलेल्या आणि महिंद्रा टॉवरच्या शेजारील साधना साधना इंडस्ट्रियल इस्टेटमधून शनिवारी सायंकाळी साडेचारच्या सुमारास धूर येऊ लागला. चार मजली इमारतीच्या तळमजल्यामधून सुरुवातीला धूर येत होता. याठिकाणी औषधे, पॅकिंगसाठी वापरले जाणारे प्लास्टिक, केमिकल तसेच केबल्स यांचा साठा करून ठेवल्याने काही वेळातच ही आग धुमसली. आगीची माहिती मिळताच अग्निशमन दलाचे जवान घटनास्थळी पोहोचले. १४ फायर इंजिन आणि टँकर्सच्या मदतीने जवळपास तीन तासांनी अग्निशमन दलाच्या जवानांनी आगीवर नियंत्रण मिळवले. आगीमुळे वरळीसह आजूबाजूच्या परिसरात धूर पसरल्याने बघ्यांनी या ठिकाणी प्रचंड गर्दी केली होती. त्यामुळे या परिसरात काही वेळ वाहतूककोंडी निर्माण झाली होती. दरम्यान, आगीवर नियंत्रण मिळविण्याचा प्रयत्न सुरू असताना अग्निशमन दलाचे १६ जवान जखमी झाले आहेत. यात एका महिला कर्मचाऱ्याचा ही समावेश असल्याचं समजतं. जखमींना पोतदार आणि केईएम रुग्णालयात उपचारासाठी नेण्यात आले असून ६ जवान अत्यवस्थ आहेत. डॉक्टरांचं एक पथक जखमींवर उपचार करत असून एक पथक घटनास्थळी रवाना करण्यात आलं आहे. दरम्यान ही आग पूर्णपणे आटोक्यात आणण्यात अग्निशमन दलााला तब्बल १२ तासांनंतर यश आले आहे

कमला मिल आगीला एक वर्ष 

कमला मिल मधील मोजो ब्रिस्टो आणि वन अबव्ह या दोन रेस्टोपबला लागलेल्या आगीत १४ जणांचा मृत्यू झाला होता. या घटनेला शनिवारी एक वर्ष पूर्ण झाले. वरळी येथे लागलेल्या आगीमुळे कमला मिल घटनेची आठवण झाल्याने मुंबईकरांच्या काळजात धस्स झाले. सुदैवाने या आगीत जीवितहानी झाली नाही.

या महिन्यातील आगी

२ डिसेंबर – महालक्ष्मी येथील १८ मजली एसआरए इमारतीला आग. वृद्ध महिलेचा मृत्यू

१७ डिसेंबर – अंधेरीच्या कामगार रुग्णलयाला आग. ११ जण मृत्युमुखी

१९ डिसेंबर – हॉटेल ट्रायडंट, माझगाव येथील हॉटेलला आग.

२० डिसेंबर – वरळी दूरदर्शन केंद्रात आग. जीवितहानी नाही

२३ डिसेंबर
 – खार येथील ब्युटी पार्लरला आग

२४ डिसेंबर – कांदिवलीच्या दामू नगरमधील कपड्याच्या कारखान्याला आग, ४ ठार

२७ डिसेंबर – चेंबूरच्या सरगम सोसायटीला आग. ५ जणांचा मृत्यू

Nikita Wagde
the authorNikita Wagde

Leave a Reply