nagpurruralNews

‘राममंदिरासाठी न्यायालयावर दबाव आणला जातोय’

14Views

नागपूर :-

अयोध्येतील राममंदिराच्या जागेच्या वादावर सर्वोच्च न्यायालयातील सुनावणीदरम्यान केंद्र सरकार बाहेरून दबाव आणत असल्याचा गंभीर आरोप काँग्रेसचे ज्येष्ठ नेते व माजी केंद्रीय गृहमंत्री सुशीलकुमार शिंदे यांनी केला. असे असले तरी याचा न्यायालयाच्या निकालावर फारसा परिणाम होण्याची शक्यता नाही, असा विश्वासही त्यांनी पत्रकारांशी बोलताना व्यक्त केला.

मारवाडी फाउंडेशनच्या पुरस्कार वितरण समारंभासाठी शिंदे नागपूरला आले होते. कार्यक्रमानंतर पत्रकारांशी बोलताना त्यांनी हे विधान केले. सध्या अयोध्येतील राममंदिर सर्वत्र चर्चेचा विषय आहे. राष्ट्रीय स्वयंसेवक संघाने मंदिर उभारण्याचा अध्यादेश काढावा, अशी मागणी केली आहे. दुसरीकडे, पंतप्रधान नरेंद्र मोदी यांनी न्यायालयाच्या निकालापूर्वी कुठलाही आदेश काढण्यात येणार नसल्याचे स्पष्ट केले आहे. विश्‍व हिंदू परिषद व इतर संघटनांनी धर्म संसदेचे आयोजन केले आहे. यात साधू, संत सहभागी होणार आहेत. या विषयावर सध्या जे काही सुरू आहे ते कशासाठी, हे सर्वांना माहिती असल्याचे शिंदे म्हणाले. न्यायालयाच्या विचाराधीन प्रकरणावर बोलणे योग्य नाही. तसेच कोणी हस्तक्षेपसुद्धा करू नये. दबावामुळे कुठलेही न्यायालय निर्णय घेत नसते. मंदिरावर १० जानेवारीला सर्वोच्च न्यायालयात सुनावणी होणार आहे. त्यानंतर आपले मत व्यक्त करण्यास सर्वांना अधिकार आहे. मात्र, आमच्याच बाजूने निर्णय व्हावा याकरिता प्रत्यक्ष-अप्रत्यक्षपणे दबाव टाकणे, त्याकरिता कृती करणे योग्य नाही. यापूर्वीसुद्धा अनेकांनी काही प्रकरणांत दबावाचे प्रयत्न केले होते. त्याचा न्यायनिवाड्यावर परिणाम झाला नाही. त्यामुळे सर्वांनी संयम दाखवावा आणि न्यायालयाच्या आदेशाचा सन्मान करावा, असेही सुशीलकुमार शिंदे म्हणाले.

Nikita Wagde
the authorNikita Wagde

Leave a Reply