News

राष्ट्रवादी नगरसेवक घेणार ‘साहेबां’ची भेट

17Views

, नगर:-

महापालिका सत्तेतील भाजप महापौराला मतदान करण्यावरून अडचणीत आलेले राष्ट्रवादी काँग्रेसचे १८ नगरसेवक थेट पक्षाध्यक्ष शरद पवार यांनाच भेटून त्यांच्यासमोर स्वतःची बाजू मांडणार असल्याचे सांगितले जाते. येत्या ४ व ५ जानेवारीला प्रदेश राष्ट्रवादीच्या मुंबईत होणाऱ्या बैठकीत जाऊन ‘मोठ्या साहेबां’समोरच (शरद पवार) पक्षाचे निरीक्षक अंकुश काकडे व माजी आमदार दादा कळमकर यांच्या महापौरपद मतदानाबाबतच्या भूमिकांविषयी नाराजी व्यक्त करणार असल्याचे सांगितले जाते.

महापालिकेच्या महापौर-उपमहापौर निवडणुकीवरून राष्ट्रवादीअंतर्गत खळबळ उडाली आहे. राज्य व देश पातळीवर राष्ट्रवादीचे वरिष्ठ नेते सत्ताधारी भाजपच्या विरोधात देशभरातील विरोधकांची एकत्रित आघाडी तयार करण्याच्या प्रक्रियेत असताना स्थानिक नगरच्या पातळीवर राष्ट्रवादीच्या नगरसेवकांनी भाजपच्या महापौरपदाच्या उमेदवाराला मतदान करून निवडून आणल्याच्या घटनेची गंभीर दखल घेण्यात आली आहे. सर्व १८ नगरसेवकांसह शहर जिल्हाध्यक्ष प्रा. माणिक विधाते यांना कारणे दाखवा नोटीस बजावण्यात आली आहे. खुलासा केला नाही तर कायदेशीर कारवाईचा इशारा दिला आहे, तसेच पक्षाच्या प्रदेश स्तरावर येत्या ४ व ५ जानेवारीला होणाऱ्या बैठकीत या नगरसेवकांवर करावयाच्या कारवाईबाबत निर्णय घेतला जाणार असल्याचे खुद्द शरद पवार यांनीच नुकत्याच झालेल्या नगर दौऱ्यातही स्पष्ट केले आहे. या पार्श्वभूमीवर आता त्यांनाच भेटून बाजू मांडण्याचे नियोजन नगरसेवकांकडून व पक्षाच्या नेत्यांकडून सुरू असल्याचे सांगितले जाते.

काकडे-कळमकरांविषयी नाराजी

महापौर-उपमहापौर निवडणुकीआधी सुरू असलेल्या विविध चर्चांच्या काळात पक्ष निरीक्षक अंकुश काकडे यांनी स्थानिक पातळीवर निर्णय घेण्याचे अधिकार दिल्याचे स्पष्ट केले होते. तसेच माजी आमदार दादा कळमकर यांनीही नगरसेवकांच्या बैठकांतून वेळप्रसंगी भाजपसमवेत जाण्याची तयारी ठेवण्याचे सांगितले होते. हे दोन्ही स्थानिक पातळीवरील वरिष्ठ नेते पक्षाचे राज्यस्तरीय पदाधिकारी व ज्येष्ठ नेत्यांशी चर्चा केल्याशिवाय असे भाष्य करणार नाहीत, असे नगरसेवकांना वाटले व म्हणून त्यांनी भाजपला मतदान करण्याच्या स्थानिक स्तरावरील निर्णयाची अंमलबजावणी केली, असे नगरसेवकांकडून सांगितले जाते. शिवाय भाजपचा महापौर निवडला गेल्यानंतर कळमकर यांनी या निर्णयाशी आपण सहमत नाही, जगताप पिता-पुत्रांचा हा निर्णय असल्याचे स्पष्ट करताना भूमिका बदलल्याचे नगरसेवकांचे म्हणणे आहे. त्यामुळेच या पार्श्वभूमीवर पक्षाकडून आलेल्या नोटिसांना लेखी उत्तर देण्याऐवजी थेट ‘साहेबां’नाच भेटून बाजू मांडण्याचे काहींनी ठरवले आहे व त्याचे नियोजन सुरू असल्याचे सांगितले जाते.

Nikita Wagde
the authorNikita Wagde

Leave a Reply