News

शरद पवार घेणार निवडणूक रिंगणातून माघार?

13Views

पुणे :-

राष्ट्रवादी काँग्रेसचे अध्यक्ष शरद पवारयांच्या माढा लोकसभा मतदारसंघातून निवडणूक लढविण्याबाबत फेरविचार सुरू असल्याचे समजते. या चर्चेला अद्याप कोणी दुजोरा दिलेला नाही, मात्र, पवार यांच्यापुढे माढ्यासह अन्य पर्यायही खुले असल्यची चर्चा आहे. तसे झाल्यास सोलापूरसह पुणे जिल्ह्यातील काही मतदारसंघांमधील समीकरणे बदलण्याची शक्यता आहे.

पवार यांनी यापूर्वी माढा लोकसभा मतदारसंघातून निवडणूक जिंकली होती. मात्र, त्यानंतर ‘आपण आता लोकसभेची निवडणूक लढविणार नाही आणि राज्यसभेतूनच संसदेतच जाणार,’ असे जाहीर केले होते. त्यानंतर विजयसिंह मोहिते-पाटील हे माढ्यातून खासदार झाले. गेल्या काही दिवसांपूर्वी पुण्यात झालेल्या वरिष्ठ नेत्यांच्या बैठकीत राष्ट्रवादीच्या नेत्यांनी पवार यांच्याकडे माढ्यातून लोकसभेची निवडणूक लढविण्याचा आग्रह धरला आणि पवार यांनी त्याबाबत अनुकूल संकेत दिले होते. त्यानंतर पवार यांनी मतदारसंघात दौरे करून विविध कार्यक्रमांना हजेरीही लावली होती. त्यामुळे यंदा माढ्यातून तेच उमेदवार, असे वातावरण निर्माण झाले होते. मात्र, गेल्या दोन दिवसांत वेगळे संकेत मिळू लागले असून पवार यांच्याकडून लोकसभेची निवडणूक लढविण्याबाबत फेरविचार सुरू असल्याचे समजते.

राष्ट्रवादीच्या गोटातून यासाठी वेगवेगळी कारणे सांगण्यात येत आहेत. पवार यांनी निवडणूक लढवावी, असा आग्रह विजयसिंह मोहिते-पाटील यांनी धरला असला, तरी पवार यांचा होकार आल्यानंतर मोहिते-पाटील यांच्या समर्थकांमध्ये नाराजी पसरली होती. कोणत्याही स्थितीत पवार यांचा विजय निश्चित मानला, तरी या मतदारसंघात अडकून पडणे राजकीयदृष्ट्या परवडणार नाही, असा विचार पुढे आल्याचे समजते.

त्याबरोबरच पुणे जिल्ह्यातील मावळ लोकसभा मतदारसंघातून माजी उपमुख्यमंत्री पार्थ पवार यांच्या उमेदवारीसाठी राष्ट्रवादीमधून आग्रह आहे. मात्र, याबाबत विचारले असता, ‘आमच्या कुटुंबातून मी आणि सुप्रिया सुळे हे दोघेच लोकसभेच्या निवडणुकीत उतरणार,’ असे पवार यांनी जाहीर केले होते. त्यानंतरही पार्थ पवार यांच्या उमेदवारीबाबत आग्रह सुरूच होता. आता स्वत: शरद पवार हे माढ्याच्या रिंगणात उतरले नाही, तर पार्थ पवार यांच्या उमेदवारीची शक्यता वाढल्याचे राष्ट्रवादीच्या गोटातून सांगण्यात येत आहे.

दुसरीकडे या फेरविचारामागे राज्यसभेच्या जागांचेही गणित असल्याचे सांगण्यात येत आहे. पवार हे लोकसभेवर निवडून गेल्यानंतर त्यांना राज्यसभेची जागा सोडावी लागणार आहे. मात्र, सध्याचे संख्याबळ पाहता ही जागा पुन्हा मिळण्याची शक्यता कमी आहे. त्यामुळे राज्यसभेची एक जागा गमविणे अयोग्य असल्याचे सांगण्यात येत आहे. दरम्यान, राष्ट्रवादीच्या नेत्यांची पुण्यात एक बैठक सुरू असून यामध्ये या विषयावर चर्चा होण्याची शक्यता आहे.

…म्हणून पवार माढा सोडण्याच्या विचारात

माढा मतदारसंघातून भाजपच्या वतीने सहकारमंत्री सुभाष देशमुख यांच्या उमेदवारीची चर्चा आहे. देशमुख हे भाजपचे सहयोगी खासदार संजय काकडे यांचे व्याही आहेत. पुणे लोकसभा मतदारसंघात काँग्रेसकडून काकडे यांची उमेदवारी चर्चेत आहे. देशमुख माढ्यातून माघार घेणार असले तर काकडे यांना पुण्यात पाठींबा देण्याची तयारी पवार यांनी दाखविल्याची जोरदार चर्चा होती. पण, देशमुख यांच्यावर भाजपने दबाव टाकून निवडणूक लढविणे अनिवार्य असल्याचे सांगितल्याचे समजते. त्यामुळं पवारांना माढा मतदारसंघावर अधिक लक्ष द्यावे लागेल अशीही चर्चा आहे. पवार यांच्या फेरविचाराच्या निर्णयामागे ही पार्श्वभूमी असल्याचे सांगण्यात येते.

Nikita Wagde
the authorNikita Wagde

Leave a Reply