News

‘सिकंदर’ची बाइक नागपुरात सुसाट.

17Views

नागपुर:-

अमिताभने पडद्यावर अनेकदा मोटरसायकल पळविली. मात्र, ‘मुकद्दर का सिकंदर’मधील त्याची राइड अधिक देखणी होती, यात कुणाचे दुमत नसावेच. असाच काहीसा फील या महानायकाने गुरुवारी नागपूरकरांना दिला, तोही नागपूरच्याच रस्त्यांवर. त्याला एक नजर पाहण्यासाठी ‘मजबूर’ झालेल्या चाहत्यांचे ‘झुंड’ महाराजबाग परिसरात दाखल झाले. अगदी ‘रास्ते का पत्थर’ हटवून ‘गिरफ्तार’ होण्याची तयारीही शेकडो चाहत्यांनी केली होती. मात्र, ‘खाकी’मुळे अनेक चाहत्यांना ‘दीवार’ मात्र पार करता आली नाही.

नागराज मंजुळे यांच्या ‘झुंड’या चित्रपटाचे चित्रीकरण सध्या नागपुरातील विविध ठिकाणी सुरू आहे. या चित्रपटातील काही सीन्स महाराजबागसमोरील डॉ. पंजाबराव देशमुख कृषी विद्यापीठाच्या कृषी महाविद्यालय परिसरात चित्रीत करण्यात येत आहेत. या शूटिंगसाठी ‘शहेनशाह’ नागपुरात तळ ठोकून आहेत. गुरुवारी या चित्रपटाचे चित्रीकरण झाले. महानायक अमिताभ बच्चन यांना बघण्यासाठी चाहते ‘फॅमिली’ व मित्रांसह दुपारी महाराजबाग परिसरात जमले. दुपारी ३ वाजताच्या सुमारास महानायक कारने येथे आले. ‘वो देखो… वो देखो…’ म्हणत चाहते चित्कारू लागले. महानायक आत गेले. चाहते निराश झाले. सेटवर जाताच ‘मुक्कदर का सिकंदर’ने सीन समजून घेतला. त्यानंतर लगेच मोटरसायकल हातात घेतली व शहरात फिरले.

कृषी महाविद्यालयाच्या आत जाण्यासाठी चाहत्यांनी भरपूर प्रयत्न केले. मात्र, पोलिसांचा बंदोबस्त व खासगी बाउन्सर्समुळे चाहत्यांच्या पदरी निराशा पडली. महाराजबागेवर जमलेल्या गर्दीमुळे अमिताभ यांची ‘बूम’ यंगिस्तानमध्येही असल्याचे दिसून आले. ‘मुंबई से आया मेरा दोस्त’ची एक झलक पाहण्यासाठी शेकडो चाहते चक्क ‘काटे’री झुडूपांवरही उभे होते. सुमारे एक तास ४५ मिनिटांचे चित्रीकरण झाले. त्यानंतर महानायक कारने नियोजित स्थळी रवाना झाला. ‘वो ‘बेमिसाल’ हैं’, एवढेच म्हणत चाहते हताश होऊन घरी परतले. ज्यांना अमिताभची झलक दिसली त्यांचा ‘आनंद’ गगनात मावेनासा होता. अमिताभ हे मोटरसायकलवर शहरभर फिरत असल्याचे चित्रीकरण महाराजबाग परिसरात झाल्याचे प्रत्यक्षदर्शींनी सांगितले.

Nikita Wagde
the authorNikita Wagde

Leave a Reply