News

१२८ तास ‘नॉनस्टॉप’ गायन!

51Views

नागपूर :-

न थकता, उत्साह मावळू न देता, सलग १२८ तास गायनाचा नवा विक्रम नागपूरचे तरुण गायक सूरज शर्मायांनी गुरुवारी सायंकाळी रचला. नेत्रदान आणि अवयवदानाच्या प्रचारासाठी करण्यात आलेल्या या गायनाचा महापराक्रम गिनीज बुक ऑफ रेकॉर्ड्समध्ये नोंदला जाण्याची शक्यता आहे. यापूर्वी नागपूरच्या सुनील वाघमारे यांच्या नावे १०५ तास सलग गायनाचा विक्रम नोंदविण्यात आला होता.

डॉ. बाबासाहेब आंबेडकर यांच्या १२८व्या जयंतीच्या जनजागृतीसाठी शर्मा यांनी गायनपराक्रमाच्या उपक्रमाला २३ फेब्रुवारी रोजी सकाळी ११.४६ वाजता सुरुवात केली. मंगळवारी दुपारी सलग गायनाचे ७५ तास पूर्ण केल्यानंतर दुपारी शर्मा यांच्या औषधोपचार करण्यात आले होते. त्यानंतर गायक शर्मा यांनी नव्या जोमाने पुन्हा गायनास सुरुवात केली होती. गुरुवारी सायंकाळी ७.३० वाजता त्यांनी सलग गायनाचे १२८ तास पूर्ण करीत नवा विक्रम रचला आहे.

गायन थांबविल्यानंतर सूरज शर्मा यांनी तातडीने रुग्णालयात हलविण्यात आले आहे. या उपक्रमादरम्यान त्यांनी कराओकेसोबतच वाद्यांवरही गीते सादर केली. गायक शर्मा यांच्या चारही बहिणी कुटुंबीयांसह इंदोरा चौकातील आयनॉक्स मॉल येथे पहिल्या दिवसापासून जातीने उपस्थित राहून भावाला प्रोत्साहित करीत होत्या. शर्मा यांचा उत्साह वाढविण्यासाठी मोठ्या संख्येने गानरसिकही उपस्थित होते. त्यांनी देशभक्ती गीतांबरोबरच नवी व जुनी गीतेही सादर केली. या विक्रमादरम्यान त्यांनी सुमारे ४०० गाणे सादर केली. या विक्रमादरम्यान त्यांनी प्रत्येक चार तासांनंतर २० मिनिटांचा ब्रेक घेतला. प्रत्येक ब्रेकनंतर डॉक्टरांचे पथक शर्मा यांच्या प्रकृतीची तपासणी करीत होते. या पथकात डॉ. विद्यानंद गायकवाड, डॉ. इरफान अहमद यांचा समावेश केला. हे नियमित तपासणी करीत आहेत.

चार हजारांपेक्षा जास्त नेत्रदानाचा संकल्प

युथ वेलफेअर असोसिएशनतर्फे या उपक्रमाचे आयोजन करण्यात आले होते. या गायनपराक्रमादरम्यान चार हजारांपेक्षा जास्त नागरिकांनी नेत्रदानाचा संकल्प सोडला. बुधवारी डॉ. उदय बोधनकर, काँग्रेसचे शहराध्यक्ष विकास ठाकरे यांनी भेट देऊन शर्मा यांना प्रोत्साहन दिले. युथ वेल्फेअर असोसिएशनचे सचिव व उपक्रमाचे आयोजक मनीष पाटील यांच्यासह इतर कार्यकर्ते व नागरिक या उपक्रमादरम्यान मोठ्या संख्येने उपस्थित होते.

Nikita Wagde
the authorNikita Wagde

Leave a Reply